KUCHING, 15 Dis: Sarawak komited nentuka integriti penerang enggau merambu langkar kereja undang-undang profesional dikena mutarka ulah nyadung berita pelesu.
Premier Sarawak, Datuk Patinggi Tan Sri Abang Johari Tun Openg madahka, pengawa numbuh undang-undang ke terit beguna enggau patut dipejalaika dikena nagang penerang ti enda  betul sereta agenda negatif nyengkaum meri penalti ngagai pesalah ungkup nyaga pengelurus tangkup pengawa media.
“Diatu berita deka pansut sebedau kitai tinduk, lalu enda lama agi, utai ke disebut aku tu pan deka pansut ba berita.
“Ketegal tu, kitai seruran patut bejejimat lebuh bejaku laban deka bisi sekeda orang deka ngaga ‘live streaming’ enggau nadai penemu nuan, lalu nya ulih ngaga penyarut enti enda diedit enggau betul.
“Engka pekara nya diambi ari konteks lalu nya deka ngasuh penyarut nyadi laban nya penerang ti salah, tang nya sebagi ari main diatu,” ku iya.
Iya madah munyi nya lebuh bejaku ba Pengerami Anugerah Pemberita Kenyalang (KJA) 2024 ditu, malam tadi.
Ku iya nambah,iya mega nyerahka ngagai raban ke bekaul dikena numbuhka undang-undang nya dalam juluk ngangkatka integriti enggau kredibiliti pemekuh media di sarawak ngagai tikas ke lebih tinggi.
Dulu agi ari nya, Abang Johari nyuaka anugerah ngagai baka pemenang KJA.
Sama bisi ngulu pengerami tu Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol enggau ke bukai . –TVS
