KUCHING, 15 Dis: TV Sarawak (TVS) mujur menang 12 anugerah nyengkaum Anugerah Premier Sarawak ungkup kategori penabur iya nya Televisyen Enggau Video Dalam Tali Arus ba Pengerami Anugerah Pemberita Kenyalang (KJA) 2024 ke diatur di Kuching Malam tadi.
TVS nyulut nengah Anugerah Pemberita Dagang enggau Ekonomi, Anugerah Pemberita Pemeruan, Anugerah Pemberita Penabur, Anugerah Pemberita Lumba, Anugerah Berita enggau ke bukai.
Anugerah Premier Sarawak mujur diulih Amirah Syazwani Shawel enggau tukang kamera Mohammed Raffiq Mohammed Kamarulizwan nengah ripot bejuluk : ‘Inovasi Midin Bawa Kelainan Dalam Dunia Gastronomi’, kelimpah bulih Anugerah Emas Pemberita Dagang enggau Ekonomi (Televisyen enggau Video Dalam Tali Arus).
Kelimpah Ari Nya, Steward Raymond Dawi mujur bulih lumur satu dalam dua kategori ti bebida dalam Jaku Iban, iya nya Anugerah Emas Pemberita – Gaya Berita enggau Anugerah Emas Pemberita Pemeruan nyengkaum bulih engkeraju ba Anugerah Berita Kategori Jaku Iban.
Ungkup Anugerah Emas Pemberita Penabur (Televisyen Enggauvideo Dalam Tali Arus) mujur dipenggi Muhammad Muqri Zulfadhli Abd Aziz.
Nangkan ke nya, Bigol anak Sulang mega mujur bulih Emas ba Anugerah Pemberita Lumba enggau Engkeraju ba Anugerah Pemberita Pemeruan dalam ba Jaku Iban.
Entara pemenang Anugerah KJA 2024 ke bukai nyengkaum Priscilla John Pillai, Mohamad Fiqri Razak, Febbright Ansie James@Tuba, Abdul Aziz Soleh enggau Muhammad Hafeezzur Rahman Muzamir.
Penuduk lumur satu mai pulai perais mata duit RM3,000, lumur dua RM2,000 enggau lumur tiga RM1,000 ungkup semua kategori, seraya perais pengaga ati bela mai perais mata duit RM500.
Berebak enggau nya, rambau pengerami nya, tanda basa mega diberi ngagai pemberita enggau tukang gambar video veteran, Basri Mohamad iya nya ex pemberita TV3 ke udah nabur jasa ngangkatka berita-berita di selampur sarawak nengah “Anugerah Tokoh Pemberita” berindik ari penyulut iya dalam bidang pengarang berita.
Pengerami nyuaka anugerah nya dikemujurka Premier Sarawak, Datuk Patinggi Tan Sri Abang Johari Tun Openg.-TVS
