PUSA, 15 Dis: Komiti Pemansang enggau Pengelikun Genturung Pendiau (JKKK) ke bisi nerima Agih Belanja Sejati Madani patut nguna belanja nya enggau manah.
Sapit Menteri Besai Dato Sri Fadillah Yusof madah, nya dikena nentuka belanja ari perintah besai ulih meri pemaik ari sukut sosio ekonomi rayat ke dipegai JKKK bekaul.
“Kita ke udah mujur bulih bantu nyadi nama pekara ke patut diadu iya nya pejalaika aja program ke udah dikemendar.
“Nyadi tentuka nya ukai semina mujur diatur tang mega mesti meruan tauka mesti diadu enggau manah.
“Kitai sama nemu laban bisi kedua nya udah meri sistem bunyi ulih disuwa enggau macham-macham program diatur (baka) betanam betupi enggau ke bukai tang deka ngemansangka pengawa tu kitai begunaka penatai pemisi tambah.
“Ari pemisi bajet JKKK nya ila kita dikearap ulih ngatur belanja enggau manah enggau baka ni kitai deka nyungkak awakka perengkaguna nya seruran meri pemaik ngagai semua JKKK ke bekaul,” ku iya.
Iya mansutka jaku nya rambau Pengawa Nyuaka Belanja Sejati Madani Peliih Pusa ba Diwan Rahmaniah Pusa, kemari.
Ku iya, JKKK ke udah bulih agih belanja nya patut bebendar agi nyapai pemujur.
Tandu iya, sida patut belajar baka ni deka ngatur akaun wang dagang enggau manah ngambika agih belanja nya ulih meri pemaik.
Ke penerang, penyampau RM1.267 juta udah diagih ungkup JKKK di Pelilih Pusa.
Sama bisi datai Kaban Kunsil Nengeri (ADUN) Layar Dato Gerald Rentap Jabu, Kaban Parlimen Batang Lupar, Shafizan Kepli, ADUN Beting Beting Maro, Razaili Gapor, ADUN Lingga, Dayang Noorazah Awang Sohor enggau ke bukai.-TVS
