KUCHING, 14 Dis: Tangkup pengawa akauntan endang beguna amat ba dalam pemansang ekonomi gadung, tebal agi dikena nentuka integriti enggau kredibiliti makit karbon di Sarawak.
Premier Sarawak, Datuk Patinggi Tan Sri Abang Johari Tun Openg madahka, berindik ari pengerembai ti jampat ngaul makit karbon, peminta bekaul enggau pengawa nyaga ari raban profesional sigi dikemeratka.
Ku iya, akauntan ngesan tanggungpengawa besai dalam nentuka pengerembai karbon dipejalaika sechara sah, ripot pemansut ti engekeman sereta kredit karbon ditukuka sechara betul.
“Pengawa nyukat karbon enda mudah. Ukai baka kitai ngira lumur dua tauka tiga, tang gis tu enda ulih disukat kita.
“Tu bepelasarka kualiti, sereta nya mih kebuah kitai begunaka juruaudit ngambika nisih karbon ti disimpan, sereta gis oksigen ti diasilka kitai.
“Pengawa baka tu begunaka seraban akauntan. Reti tu, pengawa nya ukai agi ngena taka mata duit,” ku iya.
Iya mansutka jaku nya beserimbai enggau program Apresiasi Pemegang Taruh Association Of Chartered Certified Accountants (ACCA) 2024 ditu malam tadi.
Abang Johari nerangka, ambika chunto kuasa solar diatu ngembuan kos ke lebih murah ti dibanding 10 taun ke udah ke alai kos nya nurun penyampau 80 peratus sereta kuasa solar nya diatu ba taka rega ke lebih patut.
“Sarawak mega ngembuan sumber pasir silika ti beguna amat dalam pengawa ngasilka panel solar.
“Enggau pengurang ungkus solar ke besai tu, Ejensi Kuasa Antarabansa (IEA) melabaka ungkus elektroliser dikena ngasilka hidrogen deka nurun 50 peratus manggai taun 2030,” ku iya.
Tandu Abang Johari, Sarawak endang ditemu kaya ngembuan asil pengeraja asal ti beguna amat mantu mutarka isu ubah klimet ba renggat global.
Ku iya madah, wilayah tu benasip manah laban ulih bejalaika inisiatif nangkap enggau nyimpan karbon laban ngembuan kampung ti besai sereta ekosistem bakau ke bisi daya mutarka pemansut karbon.
“Sarawak kaya enggau kampung, bakau, sereta pengeraja asal ke ulih nyerap karbon lalu Sarawak ngaul diri dalam dagang karbon enggau pengawa atur gis rumah gadung kediri empu setipak enggau pengawa global nyimpan sereta mansutka karbon baka ke dipejalaika di Norway enggau Jerman,” ku iya.-TVS
