KUCHING, 14 Dis: Atur ngagihka Bantu Tulung Barang Pemun Sarawak (SKAS) ti deka diberi sechara kredit nengah aplikasyen Sarawak Pay mantu ngemudahka penerima nguna bantu nya enggau lebih efektif sereta nemban.
Mensia mayuh lebuh dirandau pemberita madahka, atur nya lebih mudah sereta jampat laban nyauka semua atur pengawa diatu semina ba ujung jari aja.
Nitihku siku pedaja, Eleviana Zulkifli, aplikasyen Sarawak Pay tu endang mudah sereta ngemuntangka pengawa bebayar.
“Nya engka ngemudahka laban engka 70 peratus rayat Sarawak bisi Sarawak Pay. Bagi aku endang mudah laban diatu semua udah muntang, semua ari telefon enti deka ‘scan’, mayar barang, semua nengah telefon nguna aplikasyen. Muntang enggau ngemudahka,” ku iya.
Siku Graduet Universiti Malaysia Sarawak (UNIMAS), Nurul Syafiqah Sulaihi madahka aplikasyen tu mega ngemuntangka pengawa ninting hari.
“Bantu nengah Sarawak Pay tu endang ngemudahka kitai enggau mantu ngelempungka tating belanja ari sebedau tu, ti diberi ngagai kitai nengah akaun bank.
“Nyadi, enggau Sarawak Pay tu, iya lebih jampat enggau mudah,” ku iya.
Kelimpah ari nya, siku pedaja, Asri Amirrudin madahka, nyangka bisi pemar ke tapi ngagai peranak di menua pesisir ke bedau teleba enggau teknologi tu.
“Engka nya ngemudahka orang biak baka kami tang engka deka bisi pedis mimit ngagai orang ti diau ba menua pesisir, engka ari sukut baka sebedau tu kitai ngena bank.
“Nyadi enti Sarawak Pay, sida enda nemu ngena, engka sida ulih minta tulung orang bukai dikena bantai turun, rejister bagi sida,” ku iya.
Pengereja pengawa sektor peribit, Hafizaratul Iqma Ibrahim mega pechaya Sarawak Pay nyadi pilih ke pemadu manah ungkup bantu SKAS.
“Chara tu engkeman agi ari transaksyen nengah akaun bank,” ku iya.
Sebedau tu, Premier Sarawak, Datuk Patinggi Tan Sri Abang Johari Tun Openg madahka bantu SKAS deka agihka dalam sechara kredit nengah aplikasyen Sarawak Pay dikena ngelempungka tating rayat di wilayah tu tebal agi raban ke patut dibantu. –TVS
