SPAOH, 14 Dis: Sapit Premier Sarawak, Datuk Amar Douglas Uggah Embas ngansak Opis Menteri Pengerai Malaysia (KKM) ngerumban pengawa ngaga Klinik Pengerai (KK) baru kelas empat di Spaoh ke udah dikemendarka sebedau tu.
Ku iya, Perintah Sarawak Nengah Opis Tanah Enggau Survei (JTS) udah meri bayar pampas ungkup tanah ke alai ngagai klinik baru nya.
“Kitai meri terima kasih laban pengujung iya Opis Menteri Pengerai ngemendar tang ukai ngemendarka agih belanja tangmeri pemendar ungkup ngaga laban birokrasi tetap bisi taja pan bisi duit kitai enda ulih ngaga enti nadai pemendar ari sida (KKM).
“Nyadi iya ke deka digaga kitai iya nya Klinik Kelas 4 laban klinik baru ke bisi diatu udah repuk sereta begunaka palan pengerai ke disikap enggau perengkaguna moden sereta palan ke lebih lantang ungkup rayat laban klinik ke udah bisi diatu beumur bepuluh taun, udah kelalu lama,” ku iya.
Iya mansutka jaku nya maya dirandau media sepengudah Pengawa Nyuaka Chek Pampas Tanah ungkup Projek DUN N. 37 Bukit Saban ba Dewan Masyarakat Spaoh, empai lama.
Ku terang Uggah naka tu penyampau kos penuh projek ngaga klinik baru nya agi bedau dipadah ngagai iya.
Iya madah tanah urung 2.6625 hektar pemesai udah disedia lalu penyampau semua pampas ke udah dibayar ngagai pengempu tanah manggai RM505,318.50.
Uggah madah diri endang chukup ngarap klinik nya ulih digaga enggau lengkas beduduk ari pendiau klinik ke udah bisi diatu udah kelalu repuk sereta penyampau penguna ke majak nambah.
Ke penerang, klinik baru nya ila deka disikap enggau bemacham perengka baka Opis Pesakit Luar (OPD), Unit Aksiden enggau Emejensi (A&E), Unit Pengerai Ruang Bilik (MCH), Unit Ngeli, Unit Imej enggau Diagnostik (X-RAY) , Makmal Farmasi enggau ke bukai.-TVS
