MIRI, 14 Dis: Opis Menteri Pengerai (KKM) deka besaup enggau Opis Veteriner bejalaika pengawa matau penyadi kes Penyakit Tabin Jani Afrika (ASF) ke bisi ditemu nyadi di Sarawak.
Sapit Menteri Pengerai , Datuk Lukanisman Awang Sauni madah naka tu, status menua tu ba tikas likun enggau raban KKM seruran sedia napi sebarang pekara ke enda disadang.
“Pekara ke dilalau kitai ungkup ASF ngambika pengemeran, penupi jani enggau pemeli jani ari puncha ke enda temu patut bejejimat enggau kitai deka matau silik pekara bekaul enggau penyakit berampit ti nyadi di Serian.
Iya mansutka jaku nya rambau Pengerami Apresiasi Pom 5 Sekula Sekondari (SMK) Taman Tunku ditu kemari.
Berebak enggau nya, iya ke mega kaban parlimen sibuti ngelalau raban penguna ngambika bejejimat lebuh meli dagin jani ti dijual ba makit.
“ Pekara ti pemadu beguna sekali penguna ungkup musin pengerami engka bisi pengawa meli dagin jani patut dikeingat lalau ari Opis Veteriner ti ngasuh bejejimat.
“Tau peda puncha laban kitai enggai jani nya ngundan penyakit ASF tu,” ku iya.
Opis Servis Veteriner Bagi Menua Samarahan udah nyidi kes positif ke baru Penyakit Tabin Jani Afrika tauka African Swine Fever (ASF) di bagi menua Serian, empai lama.
Nangkan ke nya, bekaul isu Japanese Enkehfelaitis (JE) di Kampung Tanjung Mukah, iya madah, KKM udah ngerah opis pengerai pelilih enggau bagi menua matau pengerembai gaya nya.
“Diatu pekara ti digaga tim Entomologi kitai pasal indu utai tu iya nya benung bejalaika tuchuk vaksin ungkup JE enggau mega dalam parameter dua kilometer kitai deka nentuka kandang endur nya bisi dipejalaika atur nagang.
“Kitai deka bekerejasama enggau komuniti lebih agi tuai raban bansa dikena ngelalau ngambika pemeresi ba kandang rumah nyengkaum ai ti betakung tu mega baka kitai mutarka isu (nyamuk) aedes,” ku iya.
Ku iya, atur bejejaga seruran diambi dikena nentuka penyakit nya enda majak ngerekai.-TVS
