KUCHING, 14 Dis: Perintah Sarawak komited deka mekuhka bidang e-lumba lebih agi ngagai raban nembiak di wilayah tu, ku Dato Sri Abdul Karim Rahman Hamzah.
Menteri Dagang Temuai, Industri Kreatif Enggau Seni Pemerindang Sarawak nya madahka, tu sebagi ari chara perintah dalam nyendiaka pelasar ke bekaul dikena ngangkatka bakat sida.
Ku terang iya, e-lumba ukai semina nyadi pemerindang tang mega nyadii pelasar dikena nyungkak ekonomi, pelajar, sereta negutka penyerakup.
“E-lumba ukai semina nyadi pemerindang aja, iya nyadi ulih ngerembaika ekonomi, pelasar pelajar sereta kereban penyerakup.
“Iya meri peluang ngagai raban nembiak ukai semina bepekit tang mega ngerembaika pengelandik dalam teknologi, kereja beraban enggau nyadi ketuai.
“Nyadi wilayah ti ngemeratka inovasyen, Sarawak komited ngenegapka industri ti majak ngerembai tu.
“Nengah inisiatif baka SAREX24 ti betuju deka ngenegapka raban nembiak nengah chara nyendiaka pelasar dikena mantaika bakat sida,” ku iya.
Abdul Karim madah munyi nya nengah teks jaku iya ke dibacha Sapit Menteri Dagang Temuai, Industri Kreatif Enggau Seni Pemerindang Sarawak Datuk Snowdan Lawan rambau Pengerami Bejadika Sarawak E-Sport Expo 2024 di Dewan Masyarakat Kaunsil Mengeri Kuching Selatan (MBKS) ditu malam tadi.
Sarawak E-Sport Expo 2024 ti diatur pengelama tiga hari bepun ari 13 nyentuk 15 Disember 2024 nyendiaka perais sepenyampau RM80,000.
Expo serak tu mega digulu penyereta ari menua luar baka Brunei Darussalam, Colombia, Indonesia enggau Thailand.-TVS
