KOTA SAMARAHAN, 14 Dis: Perayat lebih agi ke diau mendam ba pelilih Asajaya enggau kandang endur ke semak dia mesti nengkira diri ngerebut peluang ekonomi, berindik ari dua projek besai deka dikemansang ba sitak nya.
Kaban Kunsil Nengeri (ADUN) Asajaya Dato Sri Abdul Karim Rahman Hamzah nyemetak madahka, dua projek besai ti deka dikemansang ba di Tanjung Embang, Asajaya nya jemah bisi daya nyungkak penatai pemisi ngagai komuniti lokal.
“Sigi udah bisi dipadah pasal padang bilun enggau penyangkai kapal dikemansangka di Tanjung Embang.
“Tanjung Embang tu ba ujung sitak Kunsil Nengeri (DUN) Asajaya, semak garis adan Asajaya.
“Nya alai, pemisi projek nya deka meri pemaik ngagai endur bukai baka, Samarahan, ke Asajaya sereta Kuching,” ku iya.
Beduduk ari nya, Abdul Karim ke mega Menteri Dagang Temuai, Industri Kreatif Enggau Seni Pemerindang Sarawak ngelalau pengempu Tanah Adat Bansa Asal (NCR), lebih agi di DUN nya anang nyual tanah sida ngagai orang bukai, ketegal deka bulih penguntung dalam timpuh pandak aja.
Tang, iya minta pengempu tanah ba pelilih nya mesti terus ngemansangka tanah NCR enggi sida dikena nambahka tikas sosio-ekonomi ruang bilik diri.
Tandu iya, pemujur dua projek besai di sitak nya jemah ukai semina mantu nambahka rega tanah perayat ke bekaul, tang mega muka peluang ke lebih besai ngaul aktiviti ekonomi.-TVS
