SPAOH, 14 Dis: Pengawa ngatur Program Beripai Perdana chukup beguna dikena narak pemanah ulah bekaul enggau pengawa ngintu pemeresi rampa menua ba raban komuniti.
Sapit Premier Sarawak Datuk Amar Douglas Uggah Embas madah program baka nya senutuk enggai juluk deka nempa pelilih Spaoh nyadi antara pelilih menua pemadu beresi di Sarawak dudi hari.
“Pekara deka ditemu udah tu iya nya nama utai ke digaga kitai aku ngarap Kaunsil Pelilih deka ngaga siti penerang program.
“Kitai ngepunka tu di Spaoh iya nya kitai deka nempa pelilih Spaoh nyadi pelilih pemadu beresi di Sarawak,” ku iya.
Uggah ke mega Kaban Kunsil Nengeri (ADUN) Bukit Saban madah munyi nya maya Program Plogging Beripai Perdana ditu ke diatur Kaunsil Pelilih Betong (MDB) ba Dewan Masyarakat Spaoh, kemari.
Kelimpah nyadi pelasar pemadu manah dikena ngedut kaul ba raban komuniti, program baka nya mega deka meri empas besai ngagai pengawa ngintu rampa menua.
Pia mega dikena meri peluang ngagai komuniti lebih raban nembiak ba Spaoh sama ngambi bagi enggau lebih mereti bekaul enggau pengawa ngintu pemeresi kandang endur ke ngelinggi.
Tandu iya, pemeresi enggau pengawa ngintu rampa menua enda patut dilempai ngagai raban bekuasa aja tang kebendar begunaka kerejasama ari semua raban.-TVS
