LAWAS, 13 Dis: Sarawak terus nyadi palan dipilih pemeranak puku menua Asia Timur baka China, Jipun enggau Korea Selatan ke dipeda ngeranchakka sektor industri ngaul sektor kuasa gadung, kuasa ulih dikemaru enggau sektor kuasa fosil enggau teknologi pemadu baru.
Sapit Premier Sarawak Datuk Amar Awang Tengah Ali Hasan madah, pekara tu bepelasarka pengulih sarawak ba baruh iring tuai Premier Sarawak Datuk Patinggi Tan Sri Abang Johari Tun Openg.
Ku Awang Tengah, Abang Johari pintar dalam ngatur pekara wang enggau ngembuan visyen timpuh panjai dikena nambahka asil penatai pemisi wilayah tu.
“Sida deka meranak puku dalam kuasa ulih dikemaru, sektor minyak enggau gis, digital ekonomi dalam kilang kacha. Lusa aku deka nitihka deligit Premier Sarawak ke Jipun.
“Kami deka betemu enggau pemeranak puku ke bisi ati.
“Tu meh tanggungpengawa kitai ngemansangka Sarawak. Bank dunya udah ngaku Sarawak dua taun bejurut nyadi wilayah bepenatai pemisi,” ku iya.
Awang Tengah ke mega Kaban Kunsil Nengeri (ADUN) Bukit Sari mansutka pekara nya maya bejaku ba Pengerami Mantar Krimas ke diatur Tuai Komuniti, Tuai Raban Bansa engggau Parti Pesaka Bumiputera Bersatu (PBB) Pampang Ba’kelalan, ditu kemari.
Ngelansa pekara bukai, Awang Tengah Ali madahka palan pelajar pom enam deka dibuka ba Sekula Sekondari (SMK) Lawas enda lama agi.
Ku iya, perengkaguna nya digaga dikena ngempuru ke nembiak sekula ai SMK Lawas, SMK Merapok enggau SMK Trusan ke deka nampung pelajar ngagai tikas pom enam ba mengeri Lawas.
“Aku udah berandau enggau Opis Pelajar, dikearap pelin tu ulih dipejalaika.
“Kitai ngembuan SMK Lawas 2 ke diatu benung dipejalaika.
“Au enggau SMK Lawas ke bisi nya, juluk kitai tang kitai mesti mega numbuhka perengkaguna ti lebih menyana , nyadi pengawa nyeruri enggau mega engka kitai merambu begunan ti patut dipejalaika kitai ungkup perengkaguna raban nembiak sekula kitai,” ku iya.-TVS
