SPAOH, 13 Dis: Ejensi Pemansang Bagi Menua Betong (BDDA) naga mayuh projek ti udah diperambu ba baruh ejensi nya ulih ditembu penuh ba taun baru.
Chairman BDDA, Datuk Amar Douglas Uggah Embas madahka, naka tu, BDDA udah ngemendarka agih belanja penyampau RM1.3 bilion dikena ngemujurka bemacham projek ba baruh ejensi nya baka jalai alun, jalai kebun, klinik, perengkaguna betanam betupi sereta ke bukai.
“Taun baru, tangkup pengawa kami iya nya nembuka projek ti udah dikemendarka ba taun tu (2024), endang BDDA udah ngemendarka mayuh bengkah projek.
“Aku pikir manggai RM1.3 bilion ungkup jalai alun, jalai kebun, klinik, perengkaguna betanam betupi tu mesti dikemujur kami ba taun baru ngambika mayuh agi projek bukai ulih tembu ba taun baru,”ku iya.
Iya mansutka pekara nya pengudah Pengerami Nyuaka Chek Pampas Tanah Bagi Projek Sitak DUN N. 37 Bukit Saban ba Diwan Komuniti Spaoh, kemari.
Uggah ke mega Sapit Premier Sarawak ngarapka semua ejensi perintah ngesan tangkup pengawa dalam bejalaika projek nya sereta nengkira diri ari diatu ungkup mansik tetiap penanggul ti ngujungka sesebengkah projek ba baruh BDDA laun dipejalaika sebedau tu.
“Kami ngarap ngagai semua ejensi perintah ti megai tanggungpengawa ngambika ulih nengkira diri, besedia meratika sebarang penanggul ti ditapi sida taun tu, ngiga chara baka ni deka mutarka penanggul nya, lalu nyingkang ke mua enggau pelin, perambu sereta kuing tuju baru,” ku iya.
Tandu iya, raban Opis Kereja Raya (JKR) mega dipinta madahka tetiap perambu kereja sida ngagai iya berengkah taun baru.
Ku iya madah, pekara nya dikena nentuka tetiap perambu nya ulih dipejalaika seriran enggau taga kereja ti udah ditetapka.-TVS
