BINTULU, 13 Dis: Tanah ba Sebauh mesti dikemansang nengah chara berurun dikena nentuka asil tanah ulih diasaika perayat lokal sereta nyeliahka hak ngempu tanah diambi orang luar.
Beduduk ari nya, Menteri Industri Pemakai, Komoditi Enggau Pemansang Wilayah Dato Sri Dr Stephen Rundi Utom ngelalau rayat mayuh anang mudah tanah diri ngagai raban bukai.
“Pengudah tanah kita nya bulih akses, siti pekara ke patut diperati tebal agi ungkup tuai komuniti mesti nentuka tanah nya enda dipindah (pengempu asal) ngagai raban bukai.
“Enti nyema tanah nya dibeli raban ke pemisi, kitai deka lenyau tanah nya,” ku iya.
Rundi mansutka pekara nya rambau pengawa kelai Nyerahka Perengka Perubat Pemun Klinik Pengerai Sebauh ditu, kemari.
Rundi ke mega Kaban Kunsil Nengeri (ADUN) Kemena mega merambu pengawa bejalaika projek sechara beraban baka Agro Park enggau koperasi dikena nentuka pemansang tanah ulih meri penguntung ngagai perayat lokal.
“Nya alai, aku enggai pekara nya nyadi laban kami deka merambu projek dipejalaika sechara beraban baka projek Agro Park.
“Kami deka numbuhka koperasi lalu numbuhka kluster ngambika tetiap endur nya bisi produk ti tau nyungkak produktiviti,” ku iya.-TVS
