SERIAN, 9 Dis: Raban biak tebal agi komuniti Iban ngambika ngintu seni kuntau awakka lanting bansa nya enda lenyau sereta ulih ditampung rebak dudi, ku Datuk Snowdan Lawan.
Sapit Menteri Dagang Temuai, Industri Kreatif enggau Seni Pemerindang Sarawak nya madahka, taja pan menua majak mansang enggau teknologi digital tang seni budaya anang dilengka laban tu mandangka lanting sesebengkah bansa.
“Pengawa ngatur pekit tu (Kuntau Sarawak 2024) laban ulih ngangkatka seni pesaka asal kitai Iban.
“Aku pechaya seni ngetanka diri baka kuntau ukai semina dikemeran sereta dipeturun ba pelilih menua kitai tang mega suku bansa Dayak di Kalimantan,” ku iya.
Iya madah munyi nya rambau Pekit Renggat Kepenudi Kuntau Sarawak 2024 ba palan servis komuniti di DUN Balai Ringin, ditu malam tadi.
Ku Snowdan madah, kuntau iya seni sereta budaya ke mesti dipandangka ngaul komunit dayak lalu inisiatif ngatur pekit tu mesti diteruska jemah ila awakka ditemua mensia mayuh.
Bisi 100 penyereta ngaul pemain kuntau ari selampur Sarawak nyereta pekit nya ti diatur kenyau 6 Disember nyentuk ke Hari Minggu.
Entara kategori ke dipekitka nyengkaum Kategori Bungai (Solo Lelaki enggau Indu), Bungai Beraban (Lelaki enggau Indu) sereta Berasuk ke ngaul achara bekuntau nguna senyata sereta bungai kuntau nadai senyata.-TVS
