SERIAN, 9 Dis: Perintah Sarawak udah ngungkupka turu penyampau RM10 juta dikena nyungkak enggau mantu pengemeran seni di Sarawak dalam ngemansangka aktiviti seni seraya mandangka budaya asal perayat di wilayah tu.
Sapit Menteri Dagang Temuai, Industri Kreatif enggau seni pemerindang sarawak Datuk Snowdan Lawan madahka sarawak ngembuan 34 pupu bansa etnik lalu sekeda ari nama bansa tu enda kala didinga rayat di wilayah tu.
Beduduk enggau nya, Snowdan madahka komitmen opis menteri ngambika nurun padang dikena ngelakuka inisiatif nya awakka seni enggau budaya semua bansa deka terus diintu nengah mayuh bengkah aktiviti seni enggau budaya ke diperambu begulai enggau opis menteri.
“Kitai mesti ngabas ngagai selampur endur di nengeri Sarawak tu ngambika betemu enggau raban bansa dikena berunding enggau sida awakka lebih nemu silik agi budaya sereta tradisi sida.
“Kitai deka nanya, enti sema sida deka neruska legasi enggau lanting sida awakka minta turu ari kitai.
“Ambika banding, enti sida deka ngajar raban biak belajar tanda bansa sida. Sida ke ngajar tu orang lunggar umur lalu sebedau sida nadai agi, enti ulih kitai deka nguna turu ngajar nembiak ngambi neruska tu,” ku iya.
Snowdan madahka pekara nya ngagai TVS rambau Pekit Renggat Kepenudi Kuntau Sarawak 2024 ba palan servis komuniti di Dun Balai Ringin, malam tadi.
Ba awakka sama, ku iya madah, program budaya komuniti Dayak iya nya bepantun deka diangkatka jemah ila.
“Enti ulih jemah ila kami deka ngatur pekit bepantun.
“Pantun tu mayuh. Enti ari sukut bansa Dayak, bansa Iban, leka main tu bisi nya dikangau Sanggai enggau Jawai, iya nya siti ari utai ke ulih digaga kitai jemah ila,” ku iya.
Sama bisi datai Presiden Gerempung Kuntau Iban Sarawak (SIKAR) Basil Laman Amen. -TVS
