BINTULU, 8 Dis: Menua Bintulu malam tadi richah enggau lagu-lagu Krismas ke disadaka urung 11,000 raban Kristian ke ngerami Program Bejalai Beraban Krismas 2024.
Achara ninting taun nya diatur Gerempung Gerija di Sarawak Pampang Bintulu betuju ngangkatka semangat Krismas ngagai semua komuniti.
Kaban Kunsil Nengeri (ADUN) Tanjong Batu Johnny Pang Leong Ming ngasaika achara nya siti pemujur besai enggau kelai penyerakup komuniti lebih agi dikena meransang raban nembiak sama enggau ngerichahka musin pengerami.
“Malam tu, kitai meri terima kasih laban Program Bejalai Beraban Krisma diatur Gerempung Gerija di Sarawak Pampang Bintulu udah mujur matak urung 11,000 iku raban Kristian ngerami mantar Krismas.
“Tu siti inisiatif ke chukup manah ungkup peranak Bintulu. Kitai ulih meda mayuh anembiak sama ngelimpangka diri ngerami Krismas ba Bintulu.
“Aku chukup gaga sida udah meri awak, enggau meri terima kasih malam tu nyadi malam ke meri penampak ngagai semua.
“Kami mega temegah ulih ngatur achara tu ba kandang mengeri lama Bintulu malam tu,” ku iya.
Iya mansutka pekara nya maya nyereta Program Bejalai Beraban Krismas di Bintulu, malam tadi.
Ku iya, pengawa bejalai beraban Krismas ukai semina dikena ngempuruka komuniti tang mega meri peransang ngagai rebak baru terus bebasaka reti penyerakup sereya mandangka ulah pengasih enggau penyiru maya musin pengerami tu.-TVS
