BETONG, 8 Dis: Pengawa ngatur Program Randau Solidariti Komuniti (RSK) deka chakah agi dipejalaika ba taun baru.
Sapit Menteri Pemansang Orang Indu, Nembiak Mit Enggau Pengelantang Komuniti Sarawak, Datuk Mohammad Razi Sitam madahka, penyerakup enggau integrasyen beguna amat dalam pengawa ngatur program nya sereta nyadi kunchi beguna dalam komuniti dikena ngenegapka ekonomi, rama enggau politik di wilayah tu.
“Penyerakup enggau integrasyen nyadi kunchi besai dikena nyapai penegap ekonomi, rama enggau politik dalam komuniti pupu bansa.
“Penyerakup enda datai pia aja, iya diterenak sereta ditanam dalam komuniti kitai ari umur ke agi biak ngambika utai tu ulih diterenak nengah aktiviti solidariti komuniti baka bekunsi enggau ejensi pemansang rama ti udah dipejalaika.
“Aku pechaya bala penyereta ulih beratika nilai enggau pemesai guna kaul ti manah ngambika kaul ti bekualiti ulih dikemanah, enda ngira lelaki tauka indu, umur, etnik enggau agama,” ku iya.
Razi mansutka jaku nya rambau pengerami bejadika Program Nutup Program Randau Solidariti Komuniti (RSK) Seksyen Betong Di Dewan Perpaduan Debak, ditu kemari.
Ku terang Kaban Kunsil Nengeri (ADUN) Saribas nya kaul ti bekualiti deka ngemudahka pengawa nyapai saum sepenemu sekalika ulih ngenegapka pengelantang rama dalam komuniti.
Tandu iya, nya mega deka ngemuntangka komuniti dalam napi isu enggau pemar rama sehcara begulai. -TVS
