MIRI, 8 Dis: Pengawa ngaduka timbuk ungkup arung Penyangkai Kapal Miri di Kuala Baram diatu tumu agi ari timpuh ditetapka.
Sapit Premier Sarawak, Datuk Amar Douglas Uggah Embas madahka, projek beungkus RM208 juta nya disadang tembu March 2027 ke alai projek nya diatu udah digaga manggai 3.5 peratus.
“Ngalihari tu tadi aku bisi ngabas taba Kuala Baram, Projek Penyangkai Kapal Tasik Dalam Kuala Baram sebagi ari Projek Kaunsil Penyangkai Kapal Miri.
“Projek tu digaga nguna kos RM208 juta. Lemai tu kitai diberi licha pasal pemansang projek.
“Aku tepantup ati laban projek tumu agi ari timpuh iya nya 3.5 peratus.
“Kitai udah berunding baka ni kitai ulih ngatur jam pekereja ngambika nya ulih ditembuka tumu ari timpuh ba bulan Mac 2027.
Uggah mansutka penerang nya sepengudah ngabas taba Projek Ngaga Timbuk Arung Palan Penyangkai Kapal Miri di Kuala Baram ditu, kemari.
Uggah mega madahka, penembu projek nya ila deka mantu palan Penyangkai Kapal Miri di Kuala Baram nyadi penyangkai kapal tasik dalam ti ulih dipasuk semua bansa kargo nyengkaum kapal dikena raun.
Pengawa ngaga timbuk tanah peninggi 25 meter nya nyadi atur dikena mutar penanggul Nanga Sungai Baram ti pabu seraya ngelancharka sektor kapal di wilayah utara Sarawak.
projek ngaga timbuk arung palan Penyangkai Kapal Miri di Kuala Baram nya dipejalai nengah kerejasama Serikat Rimbun Prima Sendirian Berhad (RPSB) enggau Serikat Konstruksyen China Communication (M) Sendirian Berhad (CCC).-TVS
