ROBAN, 7 Dis: Mensia mayuh patut berunding enggau ngempu tanggungpengawa pasal ngatur pemeresi rampa menua enggau pengeraja asal.
Kaban Kunsil Nengeri (ADUN) Krian, Friday Belik madah, tikas runding komuniti bekaul enggau pemeresi rampa menua sereta pengeraja asal mesti berubah sebaka enggau menua mansang ngambi seriris enggau pemansang ke dikembuan wilayah Sarawak diatu.
“Ambika chunto, udah ngirup lalu empalung kin kia nyadi nya mandangka siti ulah tauka pikir kitai taja ngembuan jalai besai ke manah, kitai bisi perengkaguna ke lawa.
“Nama jaku orang madah bekelas dunya ngembuan perengka guna ke manah enggau sekeda benung dikemanah tang enti komuniti kitai agi ngembuan runding kelas ketiga.
“Aku ngasai tu deka ngujungka nengeri kitai enda lama agi deka penuh laban uras ke enda diatur,” ku iya.
Friday madah munyi nya maya Program Hari Begulai Enggau Penguna Hari Intergriti Kaunsil Pelilih Saratok 2024 ba Panggau Besai Pengerami Pemakai Roban 2024, pagi tadi.
Ku iya, utai ke dipeda ba semua penyangkai bas, Palan Punsin P ba sepanjai Jalai Pan Borneo endang bukti mandangka komuniyi di wilayah tu agi ba tikas runding kelas ketiga bekaul enggau pengawa ngatur pemeresi rampa menua.
Tandu iya, tanggungpengawa nyaga pemeresi rampa menua enggau pengeraja asal iya nya tanggungpengawa semua lalu enda ulih semina dilempai ngagai Opis Perintah Menua (PBT) aja.
Ngelansa pasal program sehari nya, ku iya nya endang pantar ke pemadu manah ngagai MDS Saratok dikena ngerembaika genap polisi ke dipejalai ungkup komuniti ba renggat baruh.
Program nya diatur kenyau 30 November ke udah nyentuk 15 Disember tu nyerumba Pengerami Pemakai Roban 2024.
Sama bisi datai ADUN Kalaka Mohd Duri, Sekreari Kaunsil Pelilih Saratok, Mccrea Joseph Pererra, Pegawai Bekuasa Pelilih Mit Roban, Steve Miller Nuas enggau ke bukai.-TVS
