MIRI, 7 Dis: Sapit Menteri Ba Opis Premier Sarawak (Raban Pengereja, Imigresyen Enggau Matau Projek) Datuk Gerawat Gala nyemetak madahka, semina Perintah Gabungan Parti Sarawak (GPS) ulih nyamin pengidup jemah ti lebih tegap ungkup komuniti Orang Ulu di wilayah tu.
Iya ke mega ADUN Mulu madahka, perintah Sarawak ba baruh iring Premier Datuk Patinggi Tan Sri Abang Johari Tun Openg seruran menatika tetiap pengawa enggau pemutus ti digaga iya ti tau mantu ngemansangka komuniti Orang Ulu.
“Beduduk enggau nya, aku meransang semua kitai (Orang Ulu) beterima kasih ngagai perintah ti betuaika Premier laban menatika pengelantang komuniti kitai.
“Nya alai, kitai mesti terus beserakup, maju sama begulai, duduk sama enggau bekerejasama enggau perintah Sarawak ba baruh embing Premier Sarawak.
“Semina perintah Sarawak ke diatu ulih nyamin pengidup jemah ke lebih tegap, lebih tejamin ungkup komuniti Orang Ulu,” ku iya.
Iya mansutka jaku nya beserimbai enggau Program Bejadi Tumu tauka (soft opening) Begunan Forum ke mega ngerami Mantar Krismas 2024 ditu, kemari.
Gerawat nerangka, Begunan Gerempung Serakup Orang Ulu Sarawak, Malaysia (Forum) udah tembu digaga bulan Ogos 2024.
Permit diau (OP) udah dikeluarka Kaunsil Mengeri Miri kena 11 Oktober tu tadi.
Program Bejadika Begunan Forum malam Hari Lima tu tadi nyadi program keterubah ti diatur ba diwan nya.
Tandu iya, begunan nya digaga ngena kos penyampau RM37 juta nyadi kelai penegut gerempung sereta penyerakup komuniti Orang Ulu.-TVS
