PAKAN, 7 Dis: Pengeregas raban Tuai Rumah enggau Tuai Raban Bansa (KMKK) dalam ngatur aktiviti deka meri empas besai ngagai pemansang komuniti kelimpah ulih narak pemerani sereta sukung nembiak redak ke dijaga sida.
Kaban Kunsil Nengeri (ADUN) Pakan Tan Sri William Mawan Ikom madah, tuai rumah ke regas ngatur program deka nyadi chunto ngagai nembiak redak kelimpah ulih meri peransang ngagai mensia mayuh neladan semangat ke sama.
“Sebuah rumah, tuai iya mesti numbuhka bala komiti kediri empu.
“Iya ke udah bisi JKKK nya patut ngatur program pemansang ke baru.
“Gaga program laban iya ke tu bisi dipeda ngelama tu kita bisi ngirum video beripai (ngereja pengawa) nyadi rindu amat aku meda lebih agi bala biro.
“Nya mandangka kitai seruran bisi pemujur deka maju nyingkang ke mua,” ku iya.
Iya mansutka jaku nya rambau Pengawa Nyuaka Setipikit Tuai Rumah enggau Tuai Raban Bansa (KMKK) ba Opis Pelilih Pakan, kemari.
Mawan ke mega Penyanding Penemu ba Opis Premier Sarawak madahka pengeregas KMKK ngatur program mega deka ngujungka rayat ke dipegai sida arap sereta tau nunjukka perintah seruran seruran meri perati ngagai isu-isu ke bisi ditapi rayat ba renggat baruh.
Pekara nya ku iya ulih mantu dikena nentuka polisi ke digaga senutuk enggau guna semua serak komuniti.
Ba pengawa nya, urung 26 iku Tuai Rumah, enam iku Penghulu enggau dua iku Kapitan sereta siku Pemancha udah nerima setipikit disambung pengawa ditangkan 13 iku agi Tuai Rumah baru nerima setipikit dichiri.-TVS
