DEBAK, 6 Dis: Perintah Sarawak terus komited nyungkak potensyel dagang temuai ba Pelilih Mit Debak nengah pengawa bejalaika projek pemansang besai nyengkaum ngaga Waterfront Debak ke nelan belanja penyampau RM33 juta.
Kaban Kunsil Nengeri (ADUN) Saribas Datuk Mohammad Razi Sitam madahka penyampau 40 unit premis dagang ba tebing Sungai Rimbas deka digaga dikena ngeranchakka aktiviti ekonomi lokal sereta matak lebih mayuh temuai.
“Seharitu iya nya program nasih tanah fasa keterubah ke alai bisi 16 unit lot kedai baru digaga. Kitai deka bisi agi fasa kedua enggau 24 unit.
“Ungkup fasa tu bisi dua blok enggau 16 unit. Tu kandang endur alai ngemansangka Waterfront Debak enggau kos RM33 juta ke udah dikemendarka ba baruh BDDA.
“Udah nyiri konsultan arkitek lalu diatu dalam proses ngemanahka turai tukuh sebedau tu. Sechara prinsip aku udah setuju enggau turai tukuh tu,”ku iya.
Iya madah, projek tu ngaul kerejasama enggau sebuah serikat ari Miri enggau anggar kos penyampau RM50 juta sereta dijangka tembu ujung taun tu.
Penembu projek nya ila ku iya deka ngujungka Debak nyadi palan ke dipilih temuai berindik ari penambah infrastruktur enggau pemisi perengkaguna dagang temuai ke lebih menyana.-TVS
