SPAOH, 6 Dis: Projek Jematan Sungai Paku di Tanjung Sebekut Spaoh ti beungkus RM36 juta dijangka tembu penuh ba bulan Oktober 2025.
Sapit Premier Sarawak Datuk Amar Douglas Uggah Embas madahka, iya tepantup ati meda pemansang projek nya, ke udah satu peratus dulu ari timpuh ke udah ditetapka tauka udah digaga manggai 44 peratus.
“Jematan Sungai Paku, Spaoh, jematan tu iya nya siti jematan ti beungkus RM36 juta. Aku puas ati enggau pengerembai pengawa ngaga jematan tu.
“Aku dipadahka, nitihka JKR, satu peratus dulu ari timpuh ke udah ditetapka, iya nya 44 peratus.
“Nyadi, jematan tu ditaga tembu bulan Oktober taun baru,”ku iya.
Tandu iya, Opis Kereja Raya udah dipinta ngatur baru pejalai kereja raban kunteriktor ngambika jematan nya ulih tembu lebih tumu ari timpuh ke udah ditetapka.
“Aku minta tadi ngambika jematan tu ditembuka tumu agi ba bulan Ogos.
“Nyadi, aku udah minta JKR dikena ngatur baru pejalai kereja raban kunteriktor ngambika sida ulih nembuka jematan nya baka ti dipinta kami laban projek jematan tu udah lama.
“Tu kunteriktor kedua, kunteriktor keterubah enda mujur nembuka projek tu, nyadi projek tu nyadi projek sakit.
“Nya alai, kami udah nyiri serikat penyelamat dikena nembuka projek tu,”ku tandu iya.
Uggah ke mega Kaban Kunsil Nengeri (ADUN) Bukit Saban mansutka jaku nya pengudah ngabas seraya gawa ngagai jalai Sekula Primari (SK) Paku Central enggau Projek Jematan Sungai Paku ditu, kemari.
Iya nyemetak madahka, iya mega deka matau pengerembai projek nya enggau terit laban pengawa ngaga jematan nya udah lama dianti peranak ba kandang endur nya.
Kelimpah ari nya, penyampau RM500,000 udah dikemendarka bagi tuju ngangkatmanah jalai besai tama ke SK Paku Central sepanjai 500 meter di Spaoh, ti dijangka deka ngambi timpuh pengelama sebulan ungkup tembu.-TVS
