LUNDU, 6 Dis: Menteri Industri Pemakai, Komoditi Enggau Pemansang Wilayah Sarawak (M-Ficord) Dato Sri Dr Stephen Rundi Utom meransang raban nembiak terus chakah ngaul diri ba pengawa betanam betupi pintar enggau moden dikena nentuka penyeleda tauka nadai pungkang asil ari industri pemakai di wilayah tu.
Ku iya madah, pengawa ngena teknologi moden dalam industri betanam betupi bisi daya mantu nambahka produktiviti enggau penyampau pengeluar produk.
“Diatu kitai ngimport 70 peratus beras ari Vietnam enggau India.
“Enti nyema bisi ubah nyadi baka ubat klimet, nyadi sida enda ulih nganjung eksport beras ngagai kitai.
Tu mih maya kitai ngaga kediri dikena nangkup peminta, pekara tu ti disebut jamin pemakai.
“Anang enggai belajar…Bisi sekeda bala anak kitai ke besekula, asuh sida belajar laban sektor betanam betupi ti dikereja bebendar ulih meri penatai pemisi,” ku iya rambau pengawa bejadika Kluster Pemakai Metropolitan (MFC) Opar ditu, kemari.
Ku terang Rundi, pengawa nerenak pengerindu raban nembiak ngaul diri dalam sektor betanam betupi mesti dikerembaika dikena nentuka penyeleda sereta jamin pemakai.
Nya berindik ari sektor betanam betupi mayuh kereja sida ke udah tuai umur ke majak kurang produktif gawa.
Tandu iya, pengawa ngena Pemintar Artifisyel (AI) enggau teknologi bisi daya mantu nyungkak pemansang sektor nya.-TVS
