DEBAK, 6 Dis: Raban apai indai ke bisi anak nyelai pendiau (OKU) tauka autisme dilalau anak malu laban genap anak ke OKU nya kebendar bisi pengelebih kediri empu.
Sapit Menteri Pemansang Indu, Anak Mit enggau Pengelantangbangunan Wanita, Kanak-Kanak Dan Kesejahteraan Komuniti Sarawak, Datuk Mohammad Razi Sitam madah, apai indai patut nganjung anak sida ke autimes ngagai palan ke udah disedia ngambika bakat sida ulih dikerembai nengah Program Pelajar Khas Intergrasi (PPKI).
“Autisme kebendar untak sida tu tajam jampat nangkap utai ke dipelajar.
“Nya alai enti Autisme nyena iya nero asil iya manah, nyema iya main chess anang ngelaban laban nya endang pengelebih iya.
“Nya mih pengelebih diberi Petara ngagai sida ti nadai ba orang bukai. Bisi sekeda orang ke gerai pan nadai bulih pengelandik ke baka nya tang sida ke OKU tetap bisi.
“Nya alai apai indai ke bisi anak Austime anang mali laban anak OKU semua sida nya bisi pengelebih kediri empu,” ku iya.
Razi ke mega ADUN Saribas mansutka jaku nya rambau Pengerami Anugerah Penyulut Nembiak PPKI Sekula Primari (SK) Datuk Bandar Debak 2024 di Dewan Millennia Debak, kemari.
Ku terang iya perintah Sarawak nengah Opis Menteri Pemansang Indu, Anak Mit enggau Pengelantang Komuniti (KPWK) udah mayuh bejalaika program khas dikena ngiga bakat OKU ba wilayah tu kelebih agi ba bidang lumba.
Tandu iya, pemujur sekeda atlit para asal ari Sarawak ke udah mujur ngangkatka nama menua tu ba renggat nasional enggau antarabansa patut muka mata kelai anak OKU mega ulih pegari enti dilatih nitih chara ke betul kenyau ari mit.-TVS
