SPAOH, 6 Dis: Ejensi Pemansang Bagi Menua Betong (BDDA) deka nyendiaka agih belanja penyampau RM60 juta taun baru dikena ngangkatja sitak DUN Bukit Saban nyadi palan pemansut pemakai.
Sapit Premier Sarawak Datuk Amar Douglas Uggah Embas madahka pekara nya lebuh aum begulai enggau komiti pampang PBB Bukit Saban ba Rh Mendit Unsu, Penom kemari.
“Pengani kitai patut diiring dikena ngerebut peluang ke bisi dalam aktiviti ke dikedeka sida. Kami udah nyidi utai tanam baka sawit, lada, padi, buah enggau sayur kelimpah nupi manuk enggau jani nyadi sektor ti ngembuan potensyel ulih dikerembai.
“Industri mit baka pengawa ngaga kek enggau nyulam Baju Kebaya mega deka dikerembaika ba sitak nya,” ku iya sepengudah tembu aum nya.
Ungkup pengawa ngemakit, iya madahka Palan Ngumpul, Proses enggau Mungkus (CPPC) beungkus RM17 juta ba Bebuling diatu nyauka tembu.
Uggah ke mega Kaban Kunsil Nengeri (ADUN) Bukit Saban, madahka fasiliti nyengkaum mesin dikena ngerangkaika produk, mungkus enggau mekuka diatu benung dalam proses deka ditembuka.
STOLport Bebuling ke disadang beoperasyen kena bulan Ogos taun baru deka nyendiaka pengangkut ke jampat dikena nyendiaka produk nya enggau jampat sereta dimakitka ngagai luar.
Berebak enggau nya iya madahka Gerempung Orang Bumai Pelilih (PPK) enggau sekeda ejensi bukai deka mantu ari segi akses makit sereta ngelakuka produk, seraya ngemeratka teknik betanam betupi moden baka fertigasyen enggau hidroponik ke udah ngayanka pemujur dalam pekebun lokal.
“Kami ngarap dikena ngelatih mayuh agi pekebun senentang konsep tu ba Agropark Bebuling. Tibang tu deka ngaul 65 hektar kandang endur ungkup betanam betupi rumah gadung enggau 300 hektar ungkup pengawa betanam betupi ke bukai,” ku iya.
Iya mega madahka pemujur pekebun nambahka asil penatai pemisi sida chukup beguna taja Sarawak ngembuan status wilayah penatai pemisi tinggi, tang agi bisi komuniti ti begunaka bantu sekalika sukung dikena ngemanahka tikas pengidup sida. – TVS
