DEBAK, 5 Dis: Urung RM300, 000 agih belanja udah diberi ngagai Pengkalan Bantu Tasah Keterubah bebelika kereban bantu pemakai ungkup tujuh bagi menua ba Sarawak.
Menteri Pemansang Indu, Nembiak Mit Enggau Pengelantang Komuniti Sarawak, Dato Sri Fatimah Abdullah madahka, tuju dikena nentuka tetiap orang tasah ketegal penusah ngenyit kelebih agi ampuh bah bulih bekal pemakai ke chukup sekumbang timpuh sida tasah.
“Di selampur Sarawak, kitai udah numbuhka 31 buah palan di mua lalu pemakai tu ungkup sida ke dituntung penusah ngenyit, kelebih agi maya ujung taun baka tu lebuh ke udah enam bulan, nadai ampuh bah.
“Kitai dipelabaka deka betapi enggau ampuh bah ari bulan November nyentuk ke Mac (taun baru).
“Nuju bala mayuh taun tu sepenyampau RM349,361.00 udah diungkupka ngagai Pengkalan Bantu Tasah keterubah dikena ngemuntangka JKM meri bantu pemakai enggau bekal ai beresi ba tujuh bagi menua di selampur Sarawak,” ku iya.
Fatimah mansutka penerang nya rambau bejadika Program Latih Enggau Simulasyen Penusah Ngenyit Renggat Nengeri Sarawak Taun 2024, ditu kemari.
Ku Fatimah, kualiti pemakai ke disimpan ba tetiap palan di mua mega seruran dipatau dikena nyeliahka pemakai ke udah abis timpuh enda dikena baru.
Iya nerangka, naka tu Pengkalan Bantu Tasah Keterubah udah ditumbuhka ba bagi menua Kuching, Sri Aman, Betong, Mukah, Kapit, Bintulu enggau Miri.
Tandu iya, sepenyampau RM99,611 agih udah diungkupka dikena meli barang bantu ba stor begian enggau pelilih menua sereta mini Depoh ba lapan bagu menua ngaul Sri Aman, Betong, Sarikei, Sibu, Kapit, Mukah, Bintulu enggau Limbang.-TVS
