SPAOH, 5 Dis: Raban Indu Parti Pesaka Bumiputera Bersatu (PBB) bela ngesan tangkup pengawa ti berat dikena nentuka parti nya terus mujur, ku Dato Sri Fatimah Abdullah.
Tuai Raban Indu PBB Sarawak nya madahka pengeransing raban indu lebuh bekimpin maya pengawa bepilih mega enda ulih dikemaruh, laban udah nyata dipeda sebedau tu.
“Nama utai deka nyadi enti kitai nadai dia, sapa ti kebendar iya meda rintai pengundi?
“Kitai, raban indu. Sapa ti ngiga pengundi dalam kandang endur ba menua pesisir ke udah midang. Pengawa baka tu, sapa? Kitai indu tu.
“Nya alai, tu mih siti tangkup pengawa ti beguna amat dalam tetiap pengawa bepilih.
“Raban pengawa bepilih ti beguna iya nya nyengkaum ari raban indu kitai, amai?
“Nyadi, enggau tu anang sesekali meda sepiak mata aja, guna mih kedua-dua mata dikena meda baka ni orang indu gawa maya pengawa bepilih,” ku iya rambau Program Randau Tuai Indu Begulai Enggau Raban Indu PBB Zon 6 Betong ba Diwan Komuniti Spaoh kemari.
Urung 500 iku penyereta nyengkaum ari kaban enggau Biro Indu PBB Zon 6 Betong iya nya ari Saribas, Layar, Bukit Saban, Kalaka, Krian enggau Kabong bisi ngambi bagi dalam program randau nya.
Bela bisi datai ngemataka program nya, Sapit Tuai Satu Raban Indu PBB Sarawak, Datin Sri Angelina Ujang, Mandal Tuai II Raban Indu PBB Sarawak Umang Nangku Jabu, Datin Amar Dato Doreen Mayang sereta Penulung Pekara Wang Raban Indu PBB Sarawak Natasha Nasa Datuk Amar Douglas Uggah Embas sereta ke bukai.-TVS
