DEBAK, 5 Dis: Pengawa ngemujurka Projek Jalai Kebun ba Sitak Kunsil Nengeri (DUN) Saribas deka dipejalaika seretai berengkah 18 Disember tu.
Pekara nya dipadahka Sapit Menteri Pemansang Indu, Nembiak Mit Enggau Pengelantang Komuniti Sarawak, Datuk Mohammad Razi Sitam.
Ku terang Razi, projek ti dipinta mayuh perayat nengah Tuai Rumah enggau Tuai Raban Bansa (KMKK) nya dibagi ngagai empat zon ba baruh pegai Opis Entali Ai Enggau Parit (JPS) bagi menua Betong enggau ungkus semua iya nya RM12 juta.
“Hari kitai nyerahka taba empat projek ngangkatmanah tikas jalai kebun ba sitak kitai, DUN Saribas ungkup empat zon.
“Tetiap zon kos jalai kebun RM3 juta, reti iya RM12 juta ti deka diguna dikena bejalaika seretai projek nya berengkah 18 Disember tu.
“Jalai kebun tu iya nya jalai ti diperambu enggau dipinta mayuh genturung pendiau nengah KMKK, ke alai jalai nya, iya nya jalai akses dikena ngangkut sawit tauka asil betanam betupi ke bukai,”ku iya.
Tandu Kaban Kunsil Nengeri (ADUN) Saribas nya, bisi 16 genturung pendiau ngaul dalam pejalai projek ti dibagika ngagai empat zon nya.-TVS
