SPAOH, 5 Dis: Atur meri sukung penuh ngagai iring tuai Datuk Patinggi Tan Sri Abang Johari Tun Openg ke mega presiden enggau tuai parti Pesaka Bumiputera Bersatu (PBB) patut dibantai nengah mosyen.
Tuai Raban Indu Parti Pesaka Bumiputera Bersatu (PBB) Sarawak, Dato Sri Fatimah Abdullah madahka, mosyen nya dikena nentuka Abang Johari neruska penyulut iya nyadi tuai lumur satu wilayah tu.
“Siti ari mosyen ti diasaika kami mesti dibantaika semua raban indu iya nya, lumur satu senentang sukung kitai ngagai iya ke dipebasa, Premier kitai pasal iring tuai iya.
“Nyadi tu iya nya mosyen ti keterubah bagi semua raban indu, ngambika iya ulih terus ngiring enggau ngembing PBB sereta GPS dikena bejalaika visyen, misyen iya ke diatu ulih dipeda kitai enggau nyata ungkup mai Sarawak nyadi nengeri ti lantang ari sukut ekonomi.
“Udah nya, ari sukut inklusiviti rama sereta pemeruan rampa menua, sereta kitai endang nemu tu siti ari tanggungpengawa kitai nyadi kaban Parti PBB, semampai taluk ngagai parti enggau nyukung rat iring tuai iya ke dipebasa Premier kitai,” ku iya.
Fatimah ke mega Menteri Pemansang Indu, Nembiak Mit Enggau Pengelantang Komuniti Sarawak mansutka penemu nya ngagai pemberita Pengudah Program Randau Tuai Indu Begulai Enggau Raban Indu PBB Zon 6 Betong ba Diwan Komuniti Spaoh kemari.
Ku iya, visyen enggau misyen Abang Johari dalam ngemansangka sarawak nyadi sebuah wilayah ti lantang ari suukut ekonomi, inklusiviti rama sereta pemeruan rampa menua diatu endang nyata dipeda.
Tandu iya, bedau bisi sebarang penyampau udah ditetapka ngagai tetiap raban indu PBB ba renggat pampang dikena mantaika mosyen diri empu.-TVS
