SIMANGGANG, 2 Dis: Taja ujan bangat di mengeri Sri Aman lemai kemari ukai nyadika penanggul ngagai Tuai Pemegai Menua (TYT) Nengeri Sarawak, Tun Pehin Sri Dr Wan Junaidi Tuanku Jaafar enggau bini iya , Toh Puan Datuk Patinggi Fauziah Mohd Sanusi datai enggau ngerichahka Pesta Benak Sri Aman 2024.
Antara bala pemesai ke bisi ngambat penatai TYT enggau bini iya, Menteri Industri Pemakai, Komoditi enggau Pemansang Wilayah Sarawak, Dato Sri Dr Stephen Rundi Utom, Sapit Menteri Pelajar, Inovasyen enggau Pemansang Bakat Sarawak, Kaban Parlimen Sri Aman, Dato Sri Doris Sophia Brodie, Kaban Kunsil Nengeri (ADUN) Bukit Begunan, Datuk Mong Dagang, ADUN Engkilili, Dr Johnical Rayong Ngipa enggau ke bukai.
Penatai TYT dikelaluka enggau pengawa mandangka silat enggau tanda singa ari Gerempung Komuniti Melayu enggau Gerempung Komuniti China Sri Aman.
Tun Wan Junaidi sereta bini iya terus dibai ngagai panggau besai Pesta Benak Sri Aman 2024 di Waterfront Sri Aman urung pukul 3.00 lemai.
Rambau pengerami tu, Tun Wan Junaidi bisi ngelimpangka diri meda bansal ari 25 ejensi perintah ti dibuka sepanjai timpuh pengerami nya ke diatur ari 29 November nyentuk 1 Disember 2024.
Kelimpah ari nya, TYT mega bisi meri perais ngagai pemenang kategori Raja Sungai Benak Sri Aman 2024 sebedau bekejang pulai ninggalka pengerami nya urung pukul 5.30 lemai.-TVS
