KUCHING, 2 Dis: Sarawak deka bekerejasama enggau Universiti Cambridge bejalaika peresa standard ungkup nembiak Primari 6, Pom 3 enggau Pom 5 dikena nentuka pemansang tikas pelajar rebak dudi.
Premier Sarawak, Datuk Patinggi Tan Sri Abang Johari Tun Openg madahka, kos ungkup bejalaika peresa nya ila deka ditanggung perintah Sarawak dalam nentuka tikas pelajar anak Sarawak ulih diperati.
“Kitai nemu, menteri kitai di Sarawak, aku udah minta ngaga penerang.
“Anak kitai ba Primari 6, Pom 3 enggau Pom 5 mesti bisi peresa laban diatu polisi pelajar kitai automatik.
“Primari 6 ngagai Pom 1, Pom 2, Pom 3, Pom 5 nadai peresa. Dua champur tiga pan enda nemu.
“English nadai manah. Nyadi kitai bejalaika peresa ngambika kitai nemu.
“Sapa nyadi pengajar nemu, awak kitai nemu pemandai nembiak tu. Enti iya enda tentu beberapa, kitai mantu, kelas khas,” ku iya maya bejaku ba sebengkah program ditu, kemari.
Taja pan Sarawak nitih polisi pelajar nasional ti udah ditetapka tang raban iya tetap bejalaika peresa standard nya di wilayah tu.-TVS
