SIMANGGANG, 2 Dis: Penyampau perais mata duit ungkup pemenang Raja Sungai Pesta Benak Sri Aman dipelaba deka diperunding baru ba edisyen taun dudi.
Penyanding Penemu Komiti Besai Pesta Benak Sri Aman 2024, Datuk Francis Harden Hollis madahka, raban iya deka berundingka pekara nya begulai enggau Opis Menteri Dagang Temuai,
Industri Kreatif Enggau Seni Pemerindang Sarawak udah tu ila.
“Pasal perais kitai udah niki ari RM15,000 ke RM25,000 ba renggat Regata Sarawak.
“Kitai udah nyendiaka RM30,000.
“Nyadi Sri Aman Benak RM25,000 bida RM5,000. Nya kitai deka berunding enggau YB Dato Karim, Menteri Dagang Temuai pasal aktiviti ti deka diatur kitai ungkup taun baru,” ku iya.
Iya mansutka jaku nya pengudah achara final kategori Raja Sungai Pesta Benak Sri Aman 2024, lemai kemari.
Ku iya, pengawa ngintu Pesta Benak taun dudi deka ditambah bepelasarka sambut ti diterima serak tu.
Kelimpah ari nya, Pengerami Benak Sri Aman mega ulih ngeranchakka agi sosioekonomi perayat lokal jemah ila.
Ungkup rikod , Pesta Benak Sri Aman Edisyen Ke-21 taun 2024 enggau mujur matak urung 70,000 temuai.
Tim Khazanah Kasih Warisan mujur mai pulai perais mata duit penyampau RM25,000 pengudah menggi gelar Raja Sungai Pesta Benak Sri Aman 2024.-TVS
