KUCHING, 2 Dis: Sapit Menteri Pemansang Tumpuk Pendiau Enggau Wilayah, Datuk Rubiah Wang meransang pedagang beambi ulih ari pelasar e-dagang dikena ngerembaika rentayan dagang sida.
Ku iya madah, pelasar digital ukai semina ngubah chara dagang beoperasyen, tang mega nambahka makit enggau daya semekih dalam ekonomi dikena mantu pedagang mengkang relevan dalam sektor dagang ti majak mayuh pemar.
“Ubah tu mai peluang enggau pemar sereta ngemeratka peminta pedagang ngambi beinovasyen sereta ulih ngerembai dalam jeman digital, betukar enggau jampat ngagai model e-dagang sereta nguna pelasar nengah tali arus dikena ngerembaika pemeli sida.
“Nitihka pansik makit ari Mordor Intelligence, di Malaysia makit e-dagang dipelabaka manggai US$10.72 billion ba taun 2024 lalu deka terus nambah ngagai US$20.93 billion manggai taun 2028,” ku iya.
Rubiah mansutka jaku nya rambau pengerami ngelancharka ‘Pelan Tindakan Pemerkasaan Wanita Komuniti’ MARA ditu, empai lama.
Nampung penerang nya ku Rubiah madah, bepelasarka data SME Corp, Sektor Dagang Mikro, Mit enggau Jelan Pemesai (PMKS) ngasilka RM613 bilion tauka 39.1 peratus ngagai Asil Pemansut Kasar Dalam Menua(KDNK) taun nyin kemari.
Pengawa positif tu meransang Opis Menteri Pemansang Pedagang Enggau Koperasi (KUSKOP) dalam nambahka asil PMKS ngagai 41 peratus KDNK, seraya ulih nyadika sektor tu pengerandang besai ungkup ekonomi Malaysia.-TVS
