BAU, 2 Dis: Pengawa ngatur Karnival Nembiak Bau 2024 diperati chukup mujur asil sukung raban nembiak ari pelilih nya empu sekumbang tiga hari program nya diatur.
Sapit Menteri Pengangkut Sarawak, Datuk Henry Harry Jinep madah pemujur nya dijapai bekau ari komitmen, semangat bebakih, enggau kerejasama semua raban, nyengkaum raban nembiak kelimpah ngangkatka dagang, pekara rama, enggau spiritual kelimpah meri pemaik ngagai raban nembiak nengah bemacham program ke bisi diatur.
“Tu mandangka komitmen enggau semangat kerejasama antara bala kaban kelab enggau bala nembiak kitai.
“Enti kitai nadai semangat bebakih, semangat kerejasama, semangat deka bebaik, nyangka deka tusah kitai deka begulai ngatur program baka tu.
“Program tu mega dikena nempa kaul kitai lalu kelimpah ari nya mega ari sukut dagang , ari sukut rama, ari sukut spiritual iya.
“Nya endang siti program ke chukup manah ngagai raban nembiak kitai.
“Nengah program ke udah diatur sepanjai tiga hari tu, aku andal mayuh penemu tauka kenang ke ulih diambi ari program baka tu,”ku iya.
Henry Jinep mansutka jaku nya rambau nutup Karnival Nembiak Bau 2024 ba Palan Operasyen Pansik Enggau Pemansang Singai Sarawak (REDEEMS) ditu kemari.
Tandu iya, program-program ke meri pemaik ngagai raban nembiak patut ditampung dudi hari sereta kemayuhka agi aktiviti dikena meri pengeludas ngagai raban ke diselinting.
Berebak enggau nya, Chairman Pengatur Karnival Nembiak Bau, Kapten Joseph Emmanuel madah sekumbang tiga hari program nya, mensia mayuh lebih agi raban nembiak udah mandangka pengeransing diri datai mantu, meri sukung sereta ngambi bagi ba aktiviti ke bisi diatur.
Karnival nya dikearapka ulih nyadi peransang ngagai raban nembiak lebih agi ba sitak Bau ngatur aktiviti ke meri penguntung dudi hari.
“Nama utai ke beguna ba karnival tiga hari tu, nama utai ke ulih disimpulka kitai, lebih agi nembiak ba sitak Bau tu, datai enggau penuh pengagit mantu komuniti kitai, datai meri sukung ngagai semua vendor kitai ke bedagang.
“Kelimpah nya, sida mega datai ngagai eksibisyen chunto iya Komuniti Outreach kitai PERKESO ke bisi empat buah kompeni datai intebiu raban nembiak kitai ungkup gawa.
“Aku ngarap karnival tu deka nyadi penyungkak semangat ngagai semua raban nembiak ngambika ngereja aktiviti ke lebih manah dudi hari,”ku iya.
