KUCHING, 2 Dis: Tiga lelaki peranak lokal diriman di Kort Majistret Kuching sehari tu dikena mantu mansik kes bunuh di sebuah apartmen di Sungai Tapang, kena Hari Minggu tu tadi.
Beduduk enggau nya, dua iku saspek diriman pengelama tujuh hari berengkah sehari tu nyentuk ke 9 Disember, lalu siku agi ditan pengelama empat hari nyentuk 6 Disember tu ngambika dipansik silik.
Perintah riman nya udah dikenataika Penulung Pegawai Tasat, Mohd Safuan Mohd Nasir sebedau dikemendarka ari Majistret Ling Hui Chuan.
Semua saspek beumur 20-an nya datai di Kort Kuching urung pukul 9.22 pagi ngena baju lokap polis bechura unggu sebedau dibai pansut ari kort urung pukul 11.26 pagi.
Dulu ari nya, Tuai Polis Pelilih Padawan,  Mohd Irwan Hafiz Md Radzi nengah penerang aum media madahka, siku lelaki peranak lokal ke beumur 22 taun ditemu udah nadai sereta enggau bekau pantap  ba begian tubuh  di sebuah apartmen tumu pagi kemari.
Nampung penerang nya,  iya madahka, Bilik Operasyen IPD Padawan udah nerima penerang bekaul enggau insiden penyarut di sebuah apartmen urung  pukul 4.40 pagi.
Semua saspek ditan lalu ditasat  ba baruh Seksyen 302 Kanun Keseksaan.-TVS
