KUCHING, 2 Dis: Sarawak diatu ngembuan potensyel besai nyadi hab kuasa gadung ukai semina ba rantau Asia Tenggara tang mega ba renggat dunya.
Pekara nya dipadahka, Duta Besai Itali ke Malaysia, Massimo Rustico, ti meri sukung penuh ngagai transformasyen gadung ke dipejalaika perintah Sarawak.
“Gerempung Eropah (EU) diatu nguji ngelakuka dekarbonisasyen ba renggat dunya. Nya alai, kami bisi ati deka bekunsika teknologi kami enggau Sarawak.
“Kami mega nyukung ari sukut belanja ungkup peminta ke diguna .Kami berunding, tu sebagi ari juluk ba renggat global ke disukung penuh Gerempung Eropah enggau Itali,” ku iya.
Iya madah munyi nya sepengudah meri penemuai basa ngagai Premier Sarawak, Datuk Patinggi Tan Sri Abang Johari Tun Openg di Wisma Bapa Malaysia pagi tadi.
Ku Massimo madah, Itali nerangka Sarawak nyadi kuasa besai dalam idar kuasa sereta nyadi bakih strategik dalam ngemujurka visyen gadung dunya.
“Tu semina singkang keterubah lalu kami deka bejalaika tanggungpengawa ti beguna amat.
“Nyadi, aku gaga amat nyadi duta Itali ke Malaysia ti beguna dalam inisiatif tu lalu nyambung semua dalam sukut ke bebida laban nuan patut nyambung semua pekara tu dalam pelin strategik Sarawak sereta meretika kesemua pelin strategik Malaysia ari sukut dekarbonisasyen,” ku iya.
Berebak enggau nya, ku iya madah Sempekat Pemereti Ati (MoU) deka disain entara perintah sarawak enggau pemekuh industri besai ari Itali.
MoU nya dipelaba nyadi insiatif ti beguna dikena ngenegapka kerejasama strategik entara kededua menua kelimpah ari nyukung pengawa dekarbonisasyen enggau transformasyen kuasa.
Tandu iya, Itali mega deka terus nyukung Sarawak dalam nyapai taga inisiatif gadung sekalika meri asil ngagai transformasyen kuasa dunya.-TVS
