SIMANGGANG, 2 Dis: Sebuah hotel baru ke muat urung 50 bilik patut dibuka dikena nangkup peminta temuai ke bisi datai ngagai menua Sri Aman.
Sapit Menteri Pelajar, Inovasyen enggau Pemansang Bakat Sarawak, Datuk Francis Harden Hollis madah, tu beduduk ari penyampau hotel ke bisi ba mengeri Simanggang diatu enda ulih ungkup bala temuai tiap kali bisi pengerami besai diatur ba bagi menua nya.
“Chukup mayuh orang datai ke Sri Aman, kedai sereta pemakai semua laku.
“Pia mega hotel nyau enda chukup nyadi aku ngarapka bala pemeranak puku patut muka hotel tambah betikar empat bintang tauka tiga bintang, jangka aku nadai penanggul,” ku iya.
Harden ke mega Kaban Kunsil Nengeri (ADUN) Simanggang mansutka penemu nya maya ngemataka lumba perau nyerumba Pesta Benak Sri Aman 2024 kemari.
Ku terang iya, arapka juluk nya ulih dikemujur laban Sri Aman deka ngatur mayuh agi program dudi hari.
Tandu iya, aambika chunto Pekit Ratu Dagang Temuai enggau Ratu Kebaya Benak nyangka deka diatur kediri udah tu ila lalu nadai agi dibungkur dalam pengerami Benak.
Ke penerang Pesta Benak Sri Aman 2024 ngerikodka penatai urung 70,000 iku temuai lalu bisi nyendiaka 628 bansa endur bejual ungkup raban pedagang mit.-TVS
