SERIAN, 2 Dis: Siku nembiak lelaki bebadi nyawa lalu menyadi iya bakal sepengudah motosikal ke ditepan seduai iya ensayar lalu ngelantak besi selapat jalai ba kilometer (km) 84, Jalai Kuching-Sri Aman, kemari.
Tuai Polis Pelilih Serian, Deputi Superintendan Neil Beginda madahka ba penusah nya, tudah ke bebadi nyawa iya nya Jarren Lim Zhi Hung, 17 taun lalu menyadi iya Garren Lim Zhi Yang, 13 taun, semina bakal.
Ku Tuai Polis Pelilih Serian, Deputi Superintendan Neil Beginda madah pansik tumu tetemuka motosikal ke ditepan dua iku menyadi nya deka nuju ngagai Kuching ari Sri Aman.
“Lebuh nengah palan alai penusah nya nyadi, motosikal ke ditepan seduai ensayar ngagai besi selapat jalai ngujungka seduai iya bela tepelanting ngagai besi selapat jalai mua ke kanan,” ku iya.
Nangkan ke nya ku iya, Jarren ti bakal ba pala ditukuka bebadi nyawa ba alai penusah nya nyadi ari Paramedik Sepital Serian lalu menyadi iya ti bakal dianjung berubat ngagai Sepital Serian.
Bangkai tudah dianjung ngagai sepital serian ngambika diatur nitihka pematut lalu kes tu ditasat ba baruh Seksyen 41 (1) Akta Pengangkut Jalai 1987.-TVS
