SRI AMAN, 1 Dis: Sektor dagang temuai ti ngasilka lebih ari tujuh peratus ngagai ekonomi Sarawak dipeda ngembuan potensyel pemansang ti chukup besai dikena nyungkak ekonomi di wilayah tu manggai taun 2030.
Premier Sarawak Datuk Patinggi Tan Sri Abang Johari Tun Openg madahka, taun nyin kemari wilayah Sarawak udah nerima sepenyampau 3.92 juta iku temuai ti meri penambah ngagai penatai pemisi perintah penyampau RM9.99 bilion iya nya ba taka 7.11 peratus.
“Sektor dagang temuai ti meri asil tujuh ngagai lapan peratus ekonomi Sarawak udah dipeda ngembuan potensyel pemansang ti chukup besai dikena nyungkak ekonomi Sarawak berengkah ari diatu nyentuk ke taun 2030 enggau ke bukai.
“Taun siti nyin kemari, Sarawak udah nerima 3.92 juta iku temuai ti meri asil sepenyampau RM9.99 bilion ngagai penatai pemisi Sarawak, iya nya 7.11 peratus,” ku iya.
Abang Johari mansutka nya nengah teks jaku iya ke dibacha Sapit Premier Sarawak Datuk Amar Douglas Uggah Embas Rambau bejadika Pesta Benak Sri Aman 2024 di Waterfornt Sri Aman, kemari.
Bepelasarka rikod nya, sektor dagang temuai patut dikemeratka dikena nyungkak ekonomi rayat Sarawak.
Tandu iya, pemansang sarawak nuju taun 2030 mega udah ditetapka nengah Strategi Pemansang Pasca Covid-19 (PCDS2030) sechara berurun dikena ngubah sarawak nyadi wilayah ti maju manggai taun 2030.-TVS
