SRI AMAN, 1 Dis: Pengulih perintah Sarawak ngurus enggau ngatur asil pengaya nengeri tu enda ulih dipetalat tauka ditanya raban bukai.
Premier Sarawak Datuk Patinggi Tan Sri Abang Johari Tun Openg madahka, sarawak ukai amu baka ti didawa sekeda raban, tang Sarawak semina deka ngulihka hak nitihka atur undang-undang.
“Pengulih Sarawak ngurus asil pengaya nengeri tu enda ulih dipetalat.
“Aset keterubah ti diambi empu Sarawak lebuh aku nampung pengawa niang Tok Nan iya nya Hidro Bakun ari perintah Sarawak.
Pemujur tu ngemudahka Sarawak bisi kuasa penuh ngurus pengawa ngasilka kuasa kediri empu.
“Sarawak ukai amu baka ti didawa sekeda orang, tang semina deka ngulihka hak nitihka undang-undang menua tu,” ku iya.
Abang Johari mansutka nya nengah teks jaku iya ke dibacha Sapit Premier Sarawak Datuk Amar Douglas Uggah Embas Rambau bejadika Pesta Benak Sri Aman 2024 di Waterfornt Sri Aman, kemari.
Abang Johari nerangka, pengawa ngambi lalu ngempu Penyangkai Kapal Tasik Dalam Bintulu ari perintah besai mega deka meri kuasa penuh ngagai Sarawak ngatur sereta ngemansangka potensyel servis penyangkai kapal ti tau mantu nyungkak penumbuh ekonomi di wilayah tu.
Tandu iya, penambah beberapa penyangkai kapal bukai ti digaga di Kuching jemah, bisi daya nyadika Sarawak endur ke ngembuan servis penyangkai kapal pemadu maju ba rantau tu.
Pia mega, Sarawak bisi daya dipilih serikat pengangkut tasik antarabansa.-TVS
