ISKANDAR PUTERI (Johor), 1 Dis: Perambu penyereta tim ari Semenanjung Malaysia, Singapore enggau Filipina dalam Lumba Borneo benung diperunding.
Sapit Menteri Nembiak, Lumba Enggau Pemansang Pedagang Sarawak, Datuk Gerald Rentap Jabu madahka, pekara nya mesti dirunding sechara dalam entara Sarawak, Sabah, enggau Brunei ke nyadi pengatur begulai ungkup lumba nya.
“Ba penemu aku, kitai tau ngaga nya nyadika tesau ngagai nengeri bukai tauka menua bukai nyengkaum Singapore tauka Filipina ngambika sama datai.
“Enti kitai ngatur pengawa lumba, nama kebuah enda mai orang bukai, nyangka tikas sida lebih tinggi agi. Kitai deka ngemansangka pekara tu sereta meri pengeludas kelebih agi ngagai atlit kitai,” ku iya.
Gerald Rentap nyemetak madahka, Lumba Borneo patut ngetanka identiti nyadi achara lumba di wilayah tu, seraya muka ruang ngagai penyereta menua pengimbai baka Singapore enggau Filipina.
Taja pia, iya madahka bisi beberapa sukut beguna ti patut diperatika sebedau ngaga pemutus.
Entara iya, kapasiti pengawa ngatur, kategori lumba ke deka dipekitka sereta mega ungkus tambah sekalika penyereta tim ari luar Borneo.
Sebedau tu, Johor enggau Terengganu mega mantaika pengingin deka nyereta lumba nya dalam penyikap napi Lumba Malaysia (SUKMA) dudi hari.-TVS
