SRI AMAN, 1 Dis: Premier Sarawak Datuk Patinggi Tan Sri Abang Johari Tun Openg madahka ejensi pemansang wilayah ti ditumbuhka perintah Sarawak nyadi langkah rapat pemadu manah dikena ngemansangka semua kandang endur di serata nengeri tu.
Ku iya madah, penumbuh ejensi pemansang nya dikemujurka berindik ari Sarawak ngembuan endur ke besai sereta luas.
“Perintah Gabungan Parti Sarawak (GPS) mantaika langkah rapat tu berindik ari Sarawak sebuah wilayah ke besai enggau mesti dibagi ngagai beberapa endur pemansang ngambika bela ampit magang sereta sebela.
“Di Semenanjung bisi 11 nengeri ke bela merambu enggau bejalaika program pemansang ungkup nengeri nya.
“Nya alai, pekara ti benung dipejalaika Sarawak diatu nengah ejensi pemansang baka SADA sebaka ke nyadi di Semenanjung ti dibagi ngagai 11 nengeri,” ku iya.
Abang Johari mansutka nya nengah teks jaku iya ke dibacha Sapit Premier Sarawak Datuk Amar Douglas Uggah Embas rambau bejadika Pesta Benak Sri Aman 2024 di Waterfornt Sri Aman, kemari.
Iya mega nerangka, tetiap ejensi nya udah diberi pengawa merambu program sereta projek pemansang bepelasarka peminta lokal sereta enda nitihka langgur ari administrasyen di kuching.
Ambika chunto, Ejensi Pemansang Sri Aman (SADA) udah ngerintaika 70 projek ti mungkur pelilih Sri Aman enggau anggar kos ti udah dikemendarka penyampau 1.4 bilion.
Tandu iya, chara nya dipeda meri empas ke lebih manah enggau efektif ti dibanding ngena chara lama.-TVS
