SRI AMAN, 1 Dis: Perambu Perintah Sarawak deka mansik baru semua elaun kaban Opis Perintah Lokal, Tuai Rumah enggau Tuai Raban Bansa (KMKK) ba taun baru nerima sukung ke manah ari raban bekaul.
Tuai Komuniti Kampung Muhibbah Sri Aman, Suhaimi Johan madah, elaun KMKK endang patut ditiki beduduk ari kos pengidup ke majak niki jam ke diatu.
“Nyema elaun ditambah nya endang patut laban kos pengidup diatu majak tinggi sereta enda chukup umba KMKK suah amat baum dalam setaun bisi enam kali nasip KMKK nya bisi penatai pemisi tambah dikena nampung belanja,” ku iya.
Udah nya ba penemu Tuai Komuniti Kampungung Hulu Jalai Pasir Panas, Ahmad Saimon Tinggal atur deka nikika elaun KMKK nya endang patut laban diatu sida tau dikumbai kategori seranta laban elaun agi mit.
“Tebal agi Tuai Komuniti tu ulih dikumbai kategori seranta elaun diatu RM900 bisi KMKK ke nadai pinchin, sida ke bisi pinchin baka ex-pengajar bisi mih nya dikena nampung belanja mimit.
“Enti nadai pinchin RM900 nya tau dikumbai gerup Asnaf B40. Enti ulih kami minta Premier ngelengkaska atur nikika elaun KMKK,” ku iya.
Nangkan ke nya, ku Tuai Komuniti Kampung Muhibbah Barat, Jamali Idi iya endang nyukung amat buah penemu nikika elaun nya ungkup pengelantang enggau awakka sida ransing agi bejalaika pengawa diri.
“Aku chukup nyukung penemu dua iku bakih aku tadi iya nya elaun KMKK patut ditiki awak kami ransing agi bejalaika pengawa,” ku iya.
Sida bela mansutka timbal penemu nya maya Pengerami Pesta Benak Sri Aman 2024, kemari.
Sebedau tu Sapit Premier Sarawak Datuk Amar Dr Sim Kui Hian madah, atur bekaul enggau nikika elaun kaban Opis Perintah Lokal, Tuai Komuniti enggau Raban Bansa nyau deka tembu.
Ku iya, Opis Menteri iya deka baum dikena nyerenih pekara bekaul enggau elaun nya sebedau ke dibantai ba taun baru.-TVS
