GEDONG, 30 Nov: Perintah Sarawak nengah Opis Parit enggau Entali Ai (DID) diatu benung ngemansangka infrastruktur enggau sistem parit pemesai 54.4 hektar ungkup utai tanam padi di Lubok Punggor, di Gedong.
Premier Sarawak, Datuk Patinggi Tan Sri Abang Johari Tun Openg madahka, sistem parit nya nelan belanja sepenyampau RM30 juta ti udah dikemendarka dalam bulan Februari taun tu tadi.
“Enggau pemisi model tu, kami deka ngerembaika ngagai kesemua 520 hektar ti nitihka blok lalu (enti) datai ba semua blok tu, kami melabaka pemansut padi bepelasarka struktur ke diatu tu, kitai ulih nyapai nyentukka urung lima tan.
“Tang, enti kitai bisi sistem ti manah enggau utai ti deka dikemansang kitai, iya ulih niki ngagai tikas lapan tan (pemansut padi),” ku iya.
Iya bejaku rambau aum media sepengudah bejadika Pengerami Ngelancharka Projek Rakyat: Skim Rehabilitasi Mid Sadong I (Lubok Punggor), ba begunan nya, kemari.
Nampung penerang nya, Abang Johari madahka, chara nengah model ke sama mega deka dikena di tanjung purun di Lundu, Tanjung Bijat enggau Stumbin di Sri Aman sereta mega di Linga ke ngembuan pemesai 3,000 hektar.
“Enti pemesai tanah 3,000 hektar (dikemansang), nyadi iya deka nambahka pemansut beras ti dipelabaka aku abis nadai 50 peratus ari peminta beras dalam nengeri.”
Ku terang Abang Johari , model sistem parit baka tu mega deka digaga di menua limbang enggau lawas ti ulih meri penambah ngagai pemansut padi di Sarawak.
“Enti kitai champur semua nya, kandang endur ke bepotensyel (deka dikemansang) iya nya 61,340 hektar nyengkaum pekebun mit di kandang menua baka Spaoh, Rajang, Ba’kelalan enggau ba kebun bukai, nyadi pemansut padi kitai deka chukup tauka nyangka lebih agi dikena kitai eksport ngagai luar Sarawak.
“Nyadi, keterubah iya taga kitai iya nya ba taun 2030, tang engka deka diinsur ngagai taun 2027 enti projek tu ulih dipejalaika enggau lengkas, kelebih agi ngaul estet DID,” ku iya.-TVS
