KUCHING, 30 Nov: Perintah Sarawak komited dalam ngenegapka industri semikonduktor di wilayah tu nengah meri agih belanja ngagai SMD Semiconductor ti nyadi pemekuh besai dalam industri tu.
Premier Sarawak Datuk Patinggi Tan Sri Abang Johari Tun Openg madahka, agih belanja nya diungkupka ngagai SMD Semiconductor bepelasarka peminta industri ti begunaka sukung belanja ke besai dikena nuju ngagai renggat ke tinggi.
“Perintah Sarawak komited deka meri belanja sepenyampau RM50 juta ngagai SMD Semiconductor lalu pekara tu disimpul juraika dalam pengawa mantaika Bajet Sarawak.
“Nama utai ke ulih disebut aku enti pemujur SMD ba tikas ke manah, bisi pulai enggau potensyel, enti kita deka pekara tu, kami raban perintah tau berunding deka ngagihka mayuh agi (belanja),” ku iya.
Iya madah munyi nya lebuh ngulu Pengerami Makai Lemai Ninting Taun SMD Semikonduktor diatur ba sebuah hotel tebilang ditu, malam tadi.
Beduduk enggau nya, Premier Sarawak ngemeratka komitmen perintah Sarawak deka meri agih belanja ungkup tuju pelajar raban nembiak.
Ku iya madah, insiatif betuju ngadaka pengereja pengawa ti bepengelandik tinggi dalam industri semikonduktor enggau ekonomi baru.
“Kami bekerejasama enggau Cambridge. Kitai bisi peresa Pom 3 enggau Pom 5. Ukai nya enti sida enda mujur, udah abis pia aja. Kitai deka nguji pemintar sida.
“Enti penambah nya sechara automatik tauka nadai sebarang pelasar dikena nguji iya, nyadi kitai enda nemu standard nembiak kitai lalu enti nuan deka ngagai industri baka tu, sida mesti landik.
“Nuan patut nemu fizik, nuan patut nemu matematik, nuan patut nemu kimia lalu tu beguna amat. Enti deka belajar astronomi, belajar chip, abis nadai nuan patut nemu logam.
“Enti deka belajar chip, nuan patut nemu nama logam enggau bahan kimia ti tau dikena,” ku iya.
Ku terang Abang Johari, Sarawak enda sepenuh iya enda ingatka polisi pelajar menua, tang mega ngambi kira pemerat Jaku Inggeris nyadi elemen ti beguna dalam pengidup sekalika nyikap diri dalam pengawa jemah. -TVS
