KUCHING, 30 Nov: Perintah Sarawak mantaika dua insiatif baru ngaul orang lunggar umur dikena nentuka pengelantang raban nya terus dikenatika, ku Dato Sri Fatimah Abdullah.
Menteri Pemansang Indu, Nembiak Mit Enggau Pengelantang Komuniti (KPWK) Sarawak nya madahka, pemisi inisiatif nya nyendiaka bantu pengerai nengah Program ‘Senior Citizen Health Care Benefit’, seraya bantu belanja nengah Skim Sukung Finansial.
Ku iya madah, pemisi dua inisiatif ke ngaul bantu finansial tauka belanja nya mandangka perintah menatika pengelantang raban orang lunggar umur, sereta nentuka Sarawak nengkira diri nuju nengeri gayu manggai taun 2028.
“Nama tuju perintah bejalaika Senior Citizen Health Care Benefit tu?
“Tu dikena ngemudahka orang lunggar umur ngulihka servis berubat, penyampau bantu diungkupka ngagai tetiap iku sida berubat ba klinik peribit enggau sepital peribit iya nya RM500.
“Bantu finansial ungkup sida ba baruh garis penyeranta tu, bantu belanja orang lunggar umur, dulu RM500, taun 2025 bisi ditambah, niki RM400, nyadi berapa semua bantu tadi?
“Tu ngaul bantu Skim Bantu Orang Lunggar Umur,” ku iya.
Iya mansutka jaku nya rambau bejadika Pengerami Hari Orang Lunggar Umur Renggat Nengeri Sarawak ti diatur ba Rumah Seri Kenangan, Kuching kemari.
Bekaul enggau penyikap Sarawak nuju nengeri gayu manggai taun 2028, Fatimah nerangka, pasal tiga universiti Sarawak iya nya Universiti Swinburne, Universiti Curtin enggau Universiti Teknologi Sarawak begempung nembuka pansik senentang profil orang lunggar umur di serata Sarawak ti mungkur mengeri enggau di menua pesisir nyengkaum penempa, bansa sereta etnik.
Ku iya madah, pansik nya beguna amat dikena nentuka gaya pengelantang orang lunggar umur di selampur Sarawak, seraya ngulihka timbal penemu peminta ke patut disediaka perintah ngambika tikas pengelantang pengidup raban nya seruran dijaga manah.
Iya mega madahka, orang lunggar umur mesti dibasa laban sida kala biak kelia, gawa ba baruh perintah sereta nempa raban ti bisi pemandai ke bela besaup mai pemansang di Sarawak nyentuk ke sehari tu.-TVS
