ENGKILILI, 30 Nov: Kaban Kunsil Nengeri (ADUN) Engkilili, Dr Johnical Rayong Ngipa madah, pekara pelajar endang pugu ke pemadu beguna dikena dikena mantu ngemansangka menua dudi hari.
Beduduk ari nya, ku iya raban nembiak lebih agi ke datai ari sitak DUN Engkilili enda tau enda meras besekula dikena nunjukka pengulih diri ba sesebengkah bidang ke dipilih.
“Kunchi pemujur (pengidup) dudi hari iya pemandai sekula. Nya alai lebuh kita sekula bisi nganggauka aku ba dini-dini sekula aku sigi datai laban chukup ngemeratka pemansang ba sekula.
“Lumur satu bagi aku nadai guna kitai bisi sekula ke manah, bisi begunan ke manah enti nyema anak kitai enda mujur besekula dia kitai deka tinggal pemansang.
“Nyadi kitai besekula mesti datai ba bandir iya nya datai ba tikas ke pemadu tinggi,” ku iya.
Dr Johnical mansutka penemu nya maya Pengerami Merarau Segulai Sejalai diatur Gerempung Apai Indai enggau Pengajar (PIBG) Sekula Primari (SK) San Semanju di Lubok Antu, kemari.
Ku terang iya bidang pelajar iya nya siti ari bidang ke dikemeratka Perintah Sarawak ngujungka bemacham polisi ditempa enggau benung dipejalaika.
Nya alai, ku iya semua raban lebih agi apai indai mesti meri sukung ba sebarang aja program ke bisi diatur sekula ungkup pemansang pelajar anak sida.
Ba pengerami nya, Dr Johnical bisi ngemendarka agih belanja nengah Projek Transformasyen Menua Pesisir (RTP) sepenyampau bela RM100, 000 ngagai tiga buah sekula iya nya SK Sedarat, SK
Nanga Kesit enggau SK San Semanju dikena ngemanah agi perengkaguna ba sekula nya.
Kelimpah ari nya, agih sepenyampau RM15,000 diagih ngagai PIBG SK San Semanju dikena sida ngatur aktiviti ke bekaul.-TVS
