BAU, 29 Nov: Perintah Sarawak naka ulih neruska program Nyukat Tanah Adat Bansa Asal (NCR) ba genturung pendiau asal tauka ungkup rabak bekaul dikena mutar isu adan tanah NCR ba nengeri tu.
Ku terang Sapit Premier Sarawak, Datuk Amar Awang Tengah Ali Hassan, komitmen nya berupai dipeda nengah program nyukat tanah NCR ke udah dikemanah ba taun 2010 kenyau iya berengkah dipejalaika ari taun 1960.
Ku iya, program nyukat tanah NCR 2010 mega ngemataka dua renggat atur pengawa dititih dikena nentuka pengelurus pengawa nya.
“Kesatu iya nya pengawa nyukat kelinggi enggau udah nya tembu, kitai (Perintah Sarawak) deka mansutka gazet, dibaruh Seksyen 6 Kanun Tanah Negeri.
“Renggat kedua, pengudah sida nerima gazet lalu sida deka minta disukat kediri, sida patut ngaga peminta enggau pengawa nyukat dipejalaika kediri.
“Surat pala tanah (udah nya) deka diberi dibaruh Seksyen 18, Kanun Tanah Negeri,”ku iya.
Awang Tengah mansutka penerang nya maya Program Nyerahka Surat Pala Tanah, Komunal Bumiputera Seksyen 6, Kanun Tanah Negeri enggau Surat Pala Tanah, Seksyen 18, Kanun Tanah Negeri (Betanam Betupi enggau Genturung Pendiau Asal) ungkup sitak DUN Tasik Biru ba Dewan Sri Singai, ditu kemari.
Program nya ngemataka 956 iku nerima Surat Palan Tanah dibaruh Seksyen 18, Kanun Tanah Nengeri (KTN) ba sitak DUN Tasik Biru, mungkur menua Segong, Senibung, Tanjong Poting, Sibuluh enggau Grogo.
Dulu ari nya, Awang Tengah nyemetak madah pengawa nyukat tanah NCR enda ulih dipejalai ungkup sesiku orang nyema bisi penyarut nyadi bekaul enggau tanah.
Ke penerang Program Nyukat Tanah NCR ke dipejalaika ba taun 2010, udah mujur nyukat 2.8 juta ekar tanah di selampur Sarawak lalu 2.28 juta ikar tanah udah digazet naka bulan Oktober 2024.-TVS
