KUALA LUMPUR, 29 Nov: Kunteriktor Bumiputera diperansang gawa lebih chakah sereta nengkira diri napi ubah ngambika ulih besemekih sereta ngangkatka diri ngagai tikas ke tinggi, nyengkaum di ASEAN enggau global.
Menteri Kereja Raya Datuk Seri Alexander Nanta Linggi madahka, pemujur nya beguna amat ngambika sida disengkaum sekali pengudah sempekat komprehensif enggau progresif kena bekunsi Trans-Pasifik (CPTPP) dipejalaika.
Ku Nanta madah, tetiap pengulih perintah ti berega lebih rm330 juta mesti digaga sechara tender tebuka ngagia semua menua ke nyadi kaban CPTPP.
“Diatu aku ngelaluka pengawa baum entara kitai semua.
“Aram kitai bela berandau, anang nganti baka ni kitai ulih ngaga strategi mantu perintah ngelempungka empas ngagai kitai maya datai nya datai ke alai kitai mesti muka tender pengulih perintah,” ku iya.
Nanta mansutka penemu nya rambau Pengerami Makai Lemai Enggau Bejadika Aum Besai Ninting Taun PKMM Ke-45 ditu, malam ensana.
Beduduk enggau nya, iya ngarapka PKMM ti nyadi organisasyen ti megai semua kunteriktor Bumiputera bisi daya ngalih kuing tuju enggau lengkas, sereta bebendar gawa sechara berurun, setipak enggau arus ubah nya.
Nya nyengkaum seruran berunding sechara kritis pasal kaul organisasyen enggau gaya kelingi sereta semampai meresa enggau nyemelaka pengawa meresa tetiap pengawa ke patut ungkup pemaik semua kaban.
Iya mega minta raban kunteriktor ngemeratka inovatif sereta nyeranggap bidang baru di Malaysia, kelimpah beratika pengerembai ba dalam dunya dagang awakka bulih peluang ke manah.-TVS
